بعد از خدا بزرگ_و_معظم تمہیں تو ہو

بعد از خدا بزرگ و معظم تمہیں تو ہو

حقا کہ بادشاہ دو عالم تمہیں تو ہو

ہر شخص پر کرم ہے ہر اک شخص پر عطا

دشمن بھی جانتے ہیں مکرم تمہیں تو ہو

سب کو بتائے تم نے ہی اسرار زندگی

کون و مکاں کے ہادی اعظم تمہیں تو ہو

وہ کون سا ہے راز جو تم پر عیاں نہیں

راز الوہیت کے بھی محرم تمہیں تو ہو

تم سا نہ ہو سکا ہے نہ ہو گا کوئی بشر

فخر جہان و نازش آدم تمہیں تو ہو

مانا کہ بن کے آئے ہو تم ختم مرسلیں

شاہد ہے رب کعبہ مقدم تمہیں تو ہو

بہزادؔ مبتلا پہ بھی ہو اک نگاہ لطف

رہبر خضر کے نوح کے ہمدم تمہیں تو ہو