مولائے_کل ہو ختم_پیمبر تمہیں تو ہو

مولائے کل ہو ختم پیمبر تمہیں تو ہو

حقا کہ دو جہاں کے سرور تمہیں تو ہو

جس نے بتایا حق کو تمہاری ہی ذات ہے

جس نے بتائی راہ وہ رہبر تمہیں تو ہو

تم سے کروں نہ عرض تو کس سے ہو التجا

میرا نصیب میرا مقدر تمہیں تو ہو

تم کو ہی تک رہی ہے ہر اک چشم آرزو

محبوب خاص حضرت داور تمہیں تو ہو

تم سے ہیں آسمان و زمیں کی یہ زینتیں

ماہ تمام و مہر منور تمہیں تو ہو

تم سے بتاؤ چشم خطا کار کیا کہے

بے کس نواز و شافع محشر تمہیں تو ہو

بہزادؔ مبتلا کو دکھا دو دیار پاک

بہزادؔ مبتلا کے تو سرور تمہیں تو ہو