شہ_دین_و_دنیا ہمارے نبیؐ ہیں

شہ دین و دنیا ہمارے نبیؐ ہیں

دو عالم کا منشا ہمارے نبیؐ ہیں

زمانے کے اوپر کرم ہی کرم ہے

عنایت سراپا ہمارے نبیؐ ہیں

ہمارے نبیؐ پر خدا خود ہے شیدا

خدا ہی پہ شیدا ہمارے نبیؐ ہیں

نہ سمجھے گی دنیا یہ رمز محبت

ہماری تمنا ہمارے نبیؐ ہیں

دمکتے رہیں گے دو عالم کے ذرے

کہ وجہ تجلیٰ ہمارے نبیؐ ہیں

کدھر ہیں ادھر آئیں سب غم کے مارے

غموں کا مداوا ہمارے نبیؐ ہیں

ہیں بہزادؔ ہم اس لیے مست بطحا

کہ جانان بطحا ہمارے نبیؐ ہیں