جائے نہ کبھی دل سے تمنائے مدینہ

جائے نہ کبھی دل سے تمنائے مدینہ

یا رب رہے ہونٹوں پہ یوں ہی ہائے مدینہ

سودائی ہے وہ جس کو ہو اس دہر کا سودا

ہشیار ہے وہ جس کو ہو سودائے مدینہ

یہ دیکھنے والوں کی نظر تم سے کہے گی

جنت سے کہیں بڑھ کے ہے دنیائے مدینہ

تیری ہی ضیاؤں سے منور ہیں دو عالم

صدقے ترے اے شمع تجلائے مدینہ

خورشید جہاں تاب کے کرنوں کی قسم ہے

دنیا کا ہر اک ذرہ ہے شیدائے مدینہ

اس دل کو تو تا حشر سکوں مل نہیں سکتا

جس دل میں نہیں حب و تولائے مدینہ

بہزادؔ میں سمجھوں مجھے معراج ملی ہے

آئے جو نظر گنبد والائے مدینہ