خبر بھی ہے کیا اے نظر ڈھونڈھتا ہوں

خبر بھی ہے کیا اے نظر ڈھونڈھتا ہوں

مدینے کے دیوار و در ڈھونڈھتا ہوں

تمنا ہے جلدی سے پہنچوں مدینہ

دعاؤں میں اپنی اثر ڈھونڈھتا ہوں

جو کہنا ہے کہہ دوں گا خود ان سے رو کر

پیامی نہ میں نامہ بر ڈھونڈھتا ہوں

مرے دل میں بس غمِ درد یثرب

پیے چارہ اک چارہ گر ڈھونڈھتا ہوں

وہ برکت کے دن اور وہ رحمت کی راتیں

مدینے کے شام و سحر ڈھونڈھتا ہوں

مرا درد پنہاں ہے، ظاہر نہیں ہے

جو پہچان لے وہ نظر ڈھونڈھتا ہوں

جہاں جھک کے سر زندگی بھر نہ اٹھے

میں بہزادؔ وہ سنگِ در ڈھونڈھتا ہوں