ہم کو اک بار مدینے میں بلائیں تو سہی

ہم کو اک بار مدینے میں بلائیں تو سہی

پیاس بیتاب نگاہوں کی بجھائیں تو سہی

ہم بھی کہہ دیں گے کہ آنسو ہیں ہمارے آنسو

آگ جو دل میں لگی ہے وہ بجھائیں تو سہی

کیا کریں ہیں جو سرِ شوق میں مضطر سجدے

اپنی چوکھٹ کے قریں ہم کو بلائیں تو سہی

کام دے گی بھلا کس طرح یہ خاموش لبی

اپنا عالم جو ہے ہم ان کو بتائیں تو سہی

شکوۂ دورئی منزل جو کریں ہم تو قصور

قافلے والے ہمیں ساتھ بلائیں تو سہی

میرے نالوں میں اثر آئے تو کچھ بات بنے

میری آہیں مرا پیغام سنائیں تو سہی

جذب صادق سے اگر کام تو لے لے بہزادؔ

گر نہ چھا جائیں یہ رحمت کی گھٹائیں تو سہی