مجھے یہ سب جناب_غوث کے دیوانے لگتے ہیں

مجھے یہ سب جناب غوث کے دیوانے لگتے ہیں

یہ چہرے جتنے ہیں سب جانے اور پہچانے لگتے ہیں

تمہاری نسبتوں کا عکس جن میں بھی نہیں ہوتا

وہ آئینے ہمیشہ کے لیے دھندلانے لگتے ہیں

وہ ہیں محبوب سبحانی وہ آل پاک حیدر ہیں

وہ جن کی ٹھوکروں سے ٹھنڈے تن گرمانے لگتے ہیں

نظر پڑنے تو دو اک بار میرے غوث اعظم کی

وہ گلشن میں بدل جائیں گے جو ویرانے لگتے ہیں

انہیں کچھ فائدہ ہوگا انہیں کچھ ملتا بھی ہوگا

جسے دیکھو وہی تو آپ کے گن گانے لگتے ہیں

جو جاتے ہو تو جاؤ در پہ پر اتنا سمجھ لو تم

جو دل آتے ہیں در پر غوث کے نذرانے لگتے ہیں

ذرا سی بھی ضیاؔ پائی ہے جس نے غوث اعظم کی

اندھیرے خودبخود اس شخص سے کترانے لگتے ہیں