ہے جن کی ذات اقدس خود شفیع المذنبیں دیکھو

ہے جن کی ذات اقدس خود شفیع المذنبیں دیکھو

خدا نازاں ہے جس پر ہیں وہ فخرالمرسلیں دیکھو

ہوئے ہیں دیکھ کر حیران جبرئیل امیں دیکھو

بڑھے سد راہ سے آگے جب شفیع المذنبیں دیکھو

مقدر پر ہوئی ہے کس قدر نازاں زمیں دیکھو

گئے جب فرش سے نعلین تا عرش بریں دیکھو

ازل ہی سے حسیں تھے یُوں ساتواں آسماں لیکن

میرے آقا کے آنے سے ہوئے کتنے حسیں دیکھو

در اقدس کو پالینا مقدر والی باتیں ہیں

کہاں ہے وہ در اقدس کہاں اپنی جبیں دیکھو

میرے آقا کی فرقت جب ہوئی برداشت سے باہر

شب معراج بلوا ہی لیا رب نے وہیں دیکھو

میرے سرکار نے ہی یہ شرف پایا شب اسریٰ

ہوا بے پردہ ان کے سامنے پردہ نشیں دیکھو

اٹھے گا شور محشر میں میرے آقا کے آتے ہی

شفیع المذنبیں آئے، شفیع المذنبیں دیکھو

در خیرالبشر ملتا نہیں ہر ایک کو راہیؔ

در خیرالبشر پر ہے زمانے کی جبیں دیکھو