بہت محروم ہے وہ جو پلٹ کر در سے جاتا ہے

بہت محروم ہے وہ جو پلٹ کر در سے جاتا ہے

خدا کے گھر کا رستہ مصطفیٰ کے گھر سے جاتا ہے

ادب معلوم ہے جس کو مدینے کی زمیں تیرا

بظاہر پاؤں سے چلتا ہے لیکن سر سے جاتا ہے

ہلاکت نے دیا نمرود کی یہ درس دنیا کو

نبی کے سامنے آئے تو پھر مچھر سے جاتا ہے

زباں کھولے جہاں مست ثنائے مصطفیٰ ہو کر

حصار دست بوجہلی وہیں کنکر سے جاتا ہے

حضورؐ اس راہ پر محو خراماں ہیں شب اسریٰ

جہاں جبریل بھی جائے تو بال و پر سے جاتا ہے

اسے دیتی ہے عزت جھک کے محراب مدینہ بھی

کوئی جب بن کے مولیٰ خم ترے منبر سے جاتا ہے

کوئی ہم مشرب عشق نبی جب پاس سے جائے

تو امجدؔ رہ کے باہر وہ مرے اندر سے جاتا ہے