کھلا ہے در مصطفیٰ اللہ اللہ

کھلا ہے در مصطفیٰ اللہ اللہ

درِ رحمتِ کبریا اللہ اللہ

وہ اک نسخۂ کیمیا اللہ اللہ

وہ فیضانِ غارِ حرا اللہ اللہ

جنابِ رسولِ خدا اللہ اللہ

ہیں سردارِ کل انبیا اللہ اللہ

وہ نبیوں کے ہیں رہنما اللہ اللہ

رسولوں کے ہیں پیشوا اللہ اللہ

وہ تبلیغِ دینِ ہدیٰ اللہ اللہ

محمد ہیں نورِ خدا اللہ اللہ

امامِ رسل تاجدارِ شفاعت

رسالت ہے ان پر فدا اللہ اللہ

نجومِ ہدایت ہیں سارے صحابہ

ہیں سرکار شمس الضحیٰ اللہ اللہ

نبوت کی انگشتری کے نگینہ

وہ ہیں خاتم الانبیا اللہ اللہ

زمانہ سے ظلمت چھٹی جا رہی ہے

کہ ہیں آپ نور الہدیٰ اللہ اللہ

گھٹائیں ہیں رحمت کی وہ ان کی زلفیں

جبیں ان کی بدر الدجیٰ اللہ اللہ

شہِ دو جہاں شاہِ خوباں محمد

محمد ہیں خیر الوریٰ اللہ اللہ

نثاران پہ یہ چاند سورج ستارے

فدا ان پہ ارض و سما اللہ اللہ

وبالمومنین رؤف رحیم

محمد ہیں کہف الوریٰ اللہ اللہ

بشیراً نذیراً سراجاً منیرا

وہ اعلانِ کوہ صفا اللہ اللہ

محمد کی روح منور ہمیشہ

ہے مصروف حمدِ خدا اللہ اللہ

مرے جان و دل اور مرے دین و ایماں

فدائےحبیبِ خدا اللہ اللہ

ندا کس نے دی امتی امتی کی

ہوا جس سے محشر بپا اللہ اللہ

سرِ حشر کس کا یہ سجدہ میں سر ہے

یہ ہے کون وقفِ دعا اللہ اللہ

ہے کیسا شفاعت کا دلدوز منظر

ہے سجدہ میں آہ و بکا اللہ اللہ

ہے امت کے غم میں یہ کیسی قیامت

لرزتا ہے عرشِ خدا اللہ اللہ

مجھے رشتہ رحمتِ ہر دو عالم

برے وقت کام آگیا اللہ اللہ

خدا خود ثنائے نبی کر رہا ہے

کرے کون ان کی ثنا اللہ اللہ

خدا تو نہیں وہ مگر اتنا سمجھو

خدا سے نہیں وہ جدا اللہ اللہ

میں اے فخرؔ اک مختصر بات کہہ دوں

وہ سب کچھ ہیں بعد از خدا اللہ اللہ