چوں شود جبرئیل دربان مکانت یا علی

یا علی جب جبرئیل آپ کے مکان کے دربان ہیں تو عرش و کرسی بھی آپ کے آسمان کی زمین ہیں۔

یا علی میں یہ نہیں کہتا کہ میں آپ کا مہمان ہوں بلکہ میں آپ کے خوان نعمت کا لقمہ بردار اور ریزہ چین ہوں۔

یا علی میں خود کو کس طرح آپ کے دوستوں میں شمار کر سکتا ہوں، میرے لیے یہی فخر کافی ہے کہ میں آپ کے در کے کتوں میں شمار کیا جاتا ر ہوں۔

قرآن کے الفاظ میں آیۃ ’’من عندہ علم الکتاب‘‘ آپ کی شان میں نازل ہوئی ہے، کسی بشر کا بھی آپ کی شان کو سمجھنا محال ہے۔

آسمان کے چاند اور سورج آپ کی آستانہ کے طواف میں رات دن مصروف ہیں، یا علی صرف آپ کا آستانہ ہی اہل صفا کا کعبہ ہے۔

آپ کی بار گاہ کی وسعت کے مقابلہ میں یہ سارا آسمان ایک گوشہ ہے، یا علی یہ دونوں جہاں آپ کے عالم ولایت کا ایک پرتو ہیں۔

آپ کے ایوان کی بلندی کے مقابلہ میں عرش ایک پا انداز کی حیثیت رکھتا ہے، یا علی جنت رضوان آپ کے گلستان کا ایک عکس ہے۔

عقل کل (جبرئیل) آپ کی درس گاہ کے ابجد خواں ہیں، یا علی آپ کی شناخت یہ ہے کہ آپ عِلم حضرت مصطفیٰ کا ایک باب ہیں۔

ممکنات کا سارا علم آپ کے فیض علمی کا ایک چشمہ ہے، یا علی انسان اور جن اور فرشتے آپ کے علم کا فقط ایک نکتہ جاننے والے ہیں۔

یا علی آپ کی ہستی جملہ کائنات کے ایجاد کا باعث ہوئی، ایک ایک ذرہ آپ کے فیض وجود سے فیض یاب ہے۔

اے بو تراب اپنے کرم سے میری آنکھ کو حق بیں بنا دیجیے، کیوں کہ آپ کے آستانہ کی خاک میری آنکھوں کا سرمہ ہے۔

اے میرے سردار آپ کی درگاہ سے قربت کا آرزو مند ہوں، یا علی اگرچہ گناہ گار ہوں لیکن میں آپ کا ہوں۔