دکھا کے اس نے جمال اپنا قرار سب میرا لے لیا ہے

دکھا کے اس نے جمال اپنا قرار سب میرا لے لیا ہے

سکون دم کو، نہ چین دل کو، عجیب بے کل بنا دیا ہے

لڑی نظر جب کہ اس سے میری رہی خود پھر ذرا نہ میری

یہ عشق کمبخت کا بھلا ہو کہیں کا مجھ کو نہیں رکھا ہے

فنا ہے کیا شئے سمجھ لے اس کو بقا ہے کیا چیز پالے اس کو

اگر سمجھ کچھ خدا نے دی ہے فنا بقا ہے بقا فنا ہے

تلاش اس کی ہے عرش پر کیوں دھرا ہے کیا لا مکاں کے اندر

نظر میں پیدا جو ہو صفائی تو دیکھ لے ہر جگہ خدا ہے

جو کچھ ہے اس کا وہ سب ہے میرا جو کچھ ہے میرا وہ سب ہے اس کا

جو وہ ہے میں ہوں جو میں ہوں وہ ہے نہ میں الگ ہوں نہ وہ جدا ہے

میں نور ہوں عرش و لامکاں میں ظہور ہوں میں یہ سب جہاں میں

خدا میں مجھ میں نہیں جدائی خدا کا میں ہو مرا خدا ہے

کے الست برکم کا بلیٰ دیا تھا جواب تم نے

اب اس کو پہچانتے نہیں تم جہان والو یہ کیا ہوا ہے

میں صدقے اس مظہرِ خدا کے ہے نام عبدالکریم جس کا

ذرا توجہ میں اس نے غوثیؔ خدا کا جلوہ دکھا دیا ہے