عزم_شاہ_کربلا نے وہ کرشمہ کر دیا

عزم شاہ کربلا نے وہ کرشمہ کر دیا

نور حق سے ضو فشاں گھر گھر اجالا کر دیا

حر چلے آئے یہ کہہ کر خدمت شبیر میں

آپ کے کردار نے ایمان تازہ کر دیا

حضرت سجاد کی زنجیر کا اعلان ہے

راستہ آئینہ ہم نے دین حق کا کر دیا

اللہ اللہ یہ ادائے بندگی شبیر کی

کربلا کو ایک سجدے نے معلیٰ کر دیا

خاک پائے حضرت شبیر وہ اکسیر ہے

مبتلائے مرض غم کو پل میں اچھا کر دیا

یہ ملا نوری گھرانے سے محبت کا صلہ

اوج پر میرے مقدس کا ستارہ کر دیا

شاہ کے اس دستخط پر جاؤں میں قرباں غیاثؔ

مجھ سے ادنیٰ کو غلام شاہ والا کر دیا