تعالی اللہ زہے شانِ امیر یثرب و بطحا

اللہ اکبر امیر یثرب و بطحا کی شان بھی کیا شان ہے کہ آپ نبی کی شریعت کو فروغ دینے والے اور ملت بیضا کا چراغ ہیں۔

علی کی محبت گویا سپر ہے، آپ دوزخ اور جنت کے تقسیم کرنے والے ہیں، خدا کی قسم آپ وصی مصطفیٰ اور انس و جن کے امام ہیں۔

آپ سے محبت رکھنے والوں کے لیے ’’وال من والا‘‘ کی خوش خبری ہے اور آپ کے شمنوں کے لیے ’’عاد من عاداہ‘‘ کی دھمکی ہے۔

’’من کنت مولا‘‘ کے معنی معلوم کرنے کے لیے تمہارا ادھر ادھر جانا بے کار ہے، آنحضرت جس کے مولا ہیں حضرت علی بھی اس کے مولا ہیں۔

علی سب سے افضل ہیں، علی سب سے زیادہ کامل، علی سب سے زیادہ حسین ہیں، علی سب سے زیادہ عادل ہیں، علی ایسے بلند مرتبہ والے آقا ہیں کہ آپ کی رفعت میں کبھی کمی نہیں ہو سکتی۔

علی شیر خدا ہیں، علی صفوں کو درہم برہم کرنے والے ہیں، علی حاکم بالا دست ہیں اور علی مشکل کشا ہیں، علی ایمان ہیں، علی قرآن ہیں، علی سلطان ہیں، علی سب کے سردار ہیں۔

علی صابر ہیں، علی غلبہ رکھنے والے ہیں، علی ذاکرِ حق ہیں، علی شاکر ہیں، علی عبادت کرنے والے ہیں، علی سجدہ گذار ہیں، علی ظاہر ہیں اور علی سراسر تقویٰ ہیں۔

علی ہدایت کرنے والے ہیں، علی ہدایت یافتہ ہیں، علی فیصلہ کرنے والے ہیں، علی فتویٰ دینے والے ہیں، علی سب کے سردار ہیں، علی سب سے زیادہ جاننے والے ہیں، علی سب سے بہتر ہیں اور علی اولیٰ بالتصرف ہیں۔

کیا کہنے آپ کس قدر پاک ہیں، آپ کس قدر معصوم ہیں، آپ کا ظاہر و باطن کس قدر پاک ہے، آپ کی صورت وسیرت اور طاعت و تقویٰ کی کون تعریف کر سکتا ہے۔

آپ کی کون تعریف کر سکتا ہے، حضرت نبیٔ پاک کے ارشاد کے مطابق تین چیزوں کا دیکھنا عبادت ہے، ایک کعبہ، دوسرا قرآن، تیسرا روئے علی۔

بارگاہِ نبوت سے بطور استشنا آپ کے لیے حدیث منزل ارشاد ہوئی ہے، آپ کی نسبت نبی کریم سے وہی ہے جو حضرت ہارون کو موسیٰ سے تھی۔

قیامت کے دن آپ ساقیٔ کوثر ہوں گے، لوائے حمد آپ ہی کے ہاتھ میں ہوگا، آپ ہی جنت الماویٰ کی کلید ہوں گے۔

اللہ کے نزدیک ساری مخلوق میں سب سے زیادہ محبوب حضرت علی کی ذات اقدس ہے، اگر تجھے اس میں کوئی شک ہو تو حدیث طیر کا مطالعہ کر۔

رسول خدا کے نام کے بعد آپ کا نام اس وقت سے عرش پر لکھا ہوا ہے جب کہ حضرت آدم و حوا کا وجود ابھی پردۂ عدم میں تھا۔

آپ کا اسم گرامی نہ صرف جنت کے دروازے پر کندہ ہے بلکہ سدرہ اور طوبیٰ کی ہر شاخ اور پتے پر لکھا ہوا تھا۔

آپ کا نور نور نبی کے ساتھ اس وقت سے متصل تھا کہ ابھی عرش معلیٰ اور کرسی کا نام ونشان تک نہ تھا۔

حضرت آدم سے لے کر رسول عربی تک ہر نبی کے ساتھ ایک ولی رہا ہے مگر ظاہر بیں کی آنکھ میں حضرت محمد مصطفیٰ کے تنہا رفیق علی تھے۔

علی بطن مادر میں بھی ہر دم ذکرِ خدا میں مصروف تھے، خود عبادت آپ پر ناز کرتی تھی اور عالم ارواح آپ پر قربان ہوتا ہے۔

جتنی مدت وہ معدنِ تقویٰ (حضرت علی) شکم مادر میں رہے، رسول اللہ جب کبھی مادر حیدر کے قریب تشریف لائے۔

تو شاہِ ولایت فرماتے تھے، اے حبیبِ خالق کبریا، اے پروردگارِ بے مثال کے امین، اے پیغمبر برحق آپ پر سلام ہو۔

تو نبی کریم بھی جناب امیر سے سے ارشاد فرماتے کہ اے متقیوں کےامام، اے عدل گستر شاہ ولایت آپ پر بھی سلام ہو۔

ذرا اس مقام کی عظمت پر غور کر جہاں اللہ پاک دست رحمت تھا، میں حیدر صفدر پر کیوں نہ قربان ہو جاؤں کہ آپ کے کفِ پا کو اللہ تعالیٰ نے وہاں تک پہنچنے کی سعادت عطا فرمائی۔

حضرت عیسیٰ کی ولادت سے پہلے آسمان سے ندا آئی تھی کہ مریم مسجد اقصیٰ سے باہر چلی جائیں۔

سوائے حیدر صفدر کے کِس کویہ منزلت حاصل ہے کہ آپ کی ولادت خدائے لم یلد کے گھر یعنی خانۂ کعبہ میں ہوئی۔

اس شاہِ دیں، شیر خدانے سب سے پہلے حضرت نبیٔ کریم سردار عقبیٰ کی زبان مبارک سے لعاب دہن چوسا۔

معراج کی رات عرش اعظم نے رسول اللہ کے پاؤں چومے اور آیت قاب قوسین او ادنیٰ آپ کے مقامِ قرب کو ظاہر کرتی ہے۔

حضرت علی کی جائے معراج دوش حضرت پیغمبر ہے، معراج کی شان میں خدا نے سبحان اللذی اسریٰ ارشاد فرمایا ہے۔

صحاح ستہ کی حدیث شریف ہے کہ عالم و آدم کے پروردگار نے معراج کی رات اپنا ہاتھ دوش پیمبر پر رکھا تھا۔

اس مضمون کا میں موجد نہیں ہوں، جو بھی روضۃ الاحباب کا مطالعہ کرے گا وہ اس مضمون کو دیکھے گا۔

حضرت علی باب مدینہ عِلم ہیں اور حضرت مصطفے شہر عِلم ہیں، بغیر دروازہ کے مکان میں داخلہ کس طرح ممکن ہے۔

حضرت رسول اللہ نے حضرت علی کا مسکن مسجدمیں مقرر فرمایا تھا، (حضرت نبی کریم کے) اس اشارے اور اس معنی سے علی حضرت ہارون کی مثال ہیں۔

حضرت نبی کے لیے جو کچھ بحکم خدا مسجد میں جائز تھا وہ شاہ لا فتیٰ کے سِوا کسی غیر کے لئے ہرگز جائز نہ رکھا گیا۔

مسجد نبوی میں ہر گھر کا دروازہ نبی کے حکم سے بند کرا دیا گیا مگر حضرت علی کا دروازہ اللہ کے حکم سے کھلا رہا ہے۔

اگر کلام اللہ کی تفسیر دیکھی جائے تو معلوم ہوتا ہے کہ تین سو آیتیں حضر زہرا کے شوہر ( حضرت علی) کی شان میں نازل ہوئی ہیں۔

قرآنِ صامت کی تعظیم کی طرف حضرت علی کی تعظیم بھی فرض ہے، اے مخاطب اگر رجعت آفتاب کے بارے میں تو کچھ معلوم کرنا چاہتا ہے تو سن کیونکہ شاہِ اتقیا (حضرت علی) کا ارشاد ہے کہ میں قرآن ناطق ہوں۔

دو دفعہ آفتاب پلٹا ہے، ایک مرتبہ عہد نبوت میں اور دوسرے مرتبہ حضرت علی کے عہد خلافت میں۔

آفتاب عین مغرب تک پہنچ کر شاہ مرداں کے اعجاز سے اس وقت رُکا رہا جب تک کہ آپ کی نماز ختم نہ ہوئی۔

قرآن کریم میں جہاں کہیں اہل ایمان سے مخاطبت ہوئی ہے، وہاں ہر جگہ امیرالمؤمنین حضرت علی کا ذکر بھی ہے۔

جو شخص بغیر محبت علی کے حبّ رسول کا دم بھرتا ہے، سمجھ لو کہ کثرت سودا سے اس کے دماغ میں خلل پیدا ہو گیا ہے۔

حضرت علی کی شان کا پوچھنا ہی کیا ہے کہ وہ امام المرسلین، مصداق یٰسین و مقصدِ طہٰ کے چچا زاد بھائی ہیں۔

میں سنی ہوں مگر تعصب سے پناہ مانگتا ہوں، دنیا اور ما فیہا میں مجھے حق و انصاف ہی پسند خاطر ہے۔

میں سنجیدہ بات کہتا ہوں اور منتخب مضامین بیان کرتا ہوں، کتابوں کا مطالعہ کرکے کہتا ہوں مجھے دشمنوں کے طعنے کا کیا خوف ہو سکتا ہے۔

میں محمد اور آل محمد کا فدائی ہوں اور اپنی پیشانی خاک پر رگڑ تا ہوں اور ان کے درد محبت میں فریاد کرتا ہوں اور میرا یہ عشق بہ تعمیل حکم آیۃ مودت فی القربیٰ ہے۔

میں شاہِ مرداں کا غلام ہوں اور اپنی جان کے موتی ان پر نچھاور کرتا ہوں اور مثال بلبل عاشق ہمیشہ ان کی مدح میں نغمہ سرا ہوں۔

حضرت فاطمہ زہرا کا واسطہ اور اس ساقی کوثر کا واسطہ، جو قیامت میں تشنہ کاموں کو (جام کوثر) سے سیراب کرنے والے ہیں۔

بحق رابع آلِ عبا حسنِ سبز قبا جو باغ سیادت کے سروِ سہی قد ہیں۔

اور اِس شہید کربلا کے طفیل میں کہ جن کی عزاداری میں زمین بید کی طرح لرزاں ہے اور آسمان لالۂ سرخ کی طرح خون روتا ہے۔

الٰہی مجھے توفیق عطا فرما کہ تیرے فیض کی تائید سے جلدی ہی میں نجف اشرف کی طرف روانہ ہو جاؤں تاکہ جو کل ہونے والا ہے وہ آج ہی ہو جائے۔

آپ سے محبت کرنے والے کے لئے دو جہاں میں روحانی سرور اور عزت ہے اور فاتح خیبر کا دشمن دونوں جہان میں رسوا ہے۔

اے احسنِؔ ناداں مدح شاہِ مرداں میں خاموش ہو جا، دبیر فلک کہتا ہے کہ مجھ میں اب لکھنے کی طاقت نہیں ہے۔