دگر ہنگامۂ ماتم، زمیں تا آسمانستے

زمین سے آسماں تک پھر ایک ہنگامۂ ماتم ہے، مکان سے لا مکاں تک پھر ایک شور قیامت برپا ہے۔

حیراں ہوں کہ ذرے سے ستارے تک یہ کیا شور محشر ہے، شاید یہ ماتم شمعِ بزم کن فکان کی وجہ سے ہے۔

زمیں، یا ابو تراب کہتی ہے اور آسمان یا علی پکارتا ہے، مسیح اور خضر دونوں کی زبان پر یہی اسم اعظم ہے۔

زمین اور آسمان اس ذات مظہر کی جلوہ گاہ ہیں یہ نادر رمز ہے اور عجیب سر نہانی ہے۔

کیا بہ لحاظ ظاہر اور کیا بلحاظ باطن حضرت علی احمد مرسل کے وصی ہیں جو امتحانِ وفا کی کسوٹی پر پورے اترے ہیں۔

یہاں شہادت اور امامت دونوں ایک ہی لباس میں پوشیدہ ہیں، اے مسلمانو! امامت اور شہادت توام (جڑواں) ہیں۔

میں علی کا ہوں، مجھ سے علی کا رمز کیا پوچھتے ہو، علی لا مکاں میں ہیں، علی ہر مکاں میں ہیں۔

علی اول، علی آخر، علی ظاہر اور علی باطن ہیں، علی ہر ظاہر میں نہاں ہیں اور ہر باطن میں عیاں ہیں۔

اے بے خبرو! اس راز سربستہ کو آشکار کرتا ہوں کہ علی باطن کے باطن ہیں اور ظاہر کے ظاہر۔

آپ کی مثال کِس سے دریافت کریں، آپ کا نشان کِس سے پوچھیں آپ بے مثال کی مثال ہیں آپ بے نشان کا نشان ہیں۔

اگر تو مجھے کافر نہ سمجھے تو میں حضرت علی کو، ممکن نما واجب‘‘ کہوں گا کیوں کہ آپ کی ذات کار خانۂ کن فکاں کی پردہ دار ہے۔

اگر میں نے علی کو خدا کہہ دیا تو غلط کہا کیوں کہ میں آپ کو خدا کا بندہ مانتا ہوں، میرے یقین کے اندر گمان ہے اور یقین گمان کے اندر ہے۔

فصاحت آپ کے قلم کا جو ہر ہے، بلاغت آپ کی خطابت کا گوہر ہے، آپ کا بیشتر حکیمانہ کلام داستان در داستان ہے۔

آپ کے (حسن) بیان کو کون سمجھ سکتا ہے، عقل اول (یعنی پیغمبر آخر الزماں) کی زبان آپ کے کلام کی ترجمان ہے۔

لب پر علی ہیں، دل میں علی ہیں، خیال میں علی ہیں، جان میں علی ہیں، ترکیب وصل جسم و جان کے معانی علی ہیں۔

میں علی کو یاد کرنے والا، علی کی تلاش کرنے والا، علی کو پکارنے والا اور علی کا چاہنے والا ہوں، علی روز قیامت کی دار و گیر کے حاکم ہیں۔

میں مسلمان ہوں، میں اپنے جذب پنہاں کو علی سے اس قدر وابستہ کیے ہوئے ہوں کہ میری سانس کا ہر تار، میری زندگی کا پوشیدہ زنار بنا ہوا ہے۔

اگر حوادث کے تیروں کی بارش سے جان بچالے جاؤں تو بھی بے کار ہے کہ موت کا تیندوا تاک لگائے بیٹھا ہے اور کمان میں تیر چھپا ہوا ہے۔

میں پیچ و تاب میں ہوں کہ کوئی اہم کام نہ کرسکا اور فتنوں کی راہ میں الجھ کے رہ گیا تو میری دنیا بنی نہ آخرت سنور سکی نہ یہ حاصِل ہوا نہ وہ۔

قفس ٹوٹ گیا اور ہمارے عزم پرواز پر برقِ بلا مسکراتی ہے کہ ہمارا طائر روح حسرت زدہ اپنے آشیانے میں موت کا شکار ہو گیا۔

ہم گنہگاروں کو بھلا موج حوادث کا کیا خوف ہو سکتا ہے کہ ان کی نگاہِ (کرم) ہماری امیدوں کی کشتی کا بادباں ہے۔

گرامیؔ! آج رات تیری بکواس نے مدعی کا سراڑا دیا، کیا کہنے تیری زبان قلم کے جو اس کے لیے اصفہانی تلوار بن گئی ہے۔