ہاں وارث_محمد وارث علی تمہیں ہو

ہاں وارث محمد وارث علی تمہیں ہو

شاہوں کے شاہ تم ہو حق کے ولی تمہیں ہو

یہ دل ہے گھر تمہارا اس میں تم ہی تمہیں ہو

تم مظہر خدا ہو سر خفی تمہیں ہو

تم کو بنایا حق نے شمع رہ ہدایت

موسیٰ نے تھی جو دیکھی وہ روشنی تمہیں ہو

تم ہی نے مجھ کو مارا تم ہی کرو گے زندہ

جان حزیں تمہیں ہو دل کی خوشی تمہیں ہو

ہو شکر یا شکایت سب ہے تمہیں سے مجھ کو

جو مدعا ہے اپنا وہ مدعی تمہیں ہو

دیکھا جمال احمدؐ پایا جلال حیدر

روح نبیؐ تمہیں ہو جان علی تمہیں ہو

کھولی جو چشم حق ہیں دیکھا بشر ہو لیکن

جن و ملک فلک کیا سب کچھ تم ہو تمہیں ہو

وہ مطلع حقیقت پنہاں تھا جو ازل میں

ظاہر ہوا وہ آخر نور نبی تمہیں ہو

دیکھا چھپا خدا کو ہے کسوت بشر میں

شور انا تمہیں ہو رمز خفی تمہیں ہو

پاتے ہیں نور جس سے شمس و قمر فلک پر

وہ اخترؔ درخشاں مہر جلی تمہیں ہو