منور ہیں وہ آنکھیں جن میں ندرت شاہ_بطحا کی

منور ہیں وہ آنکھیں جن میں ندرت شاہ بطحا کی

مدینہ ہے وہ سینہ جس میں الفت شاہ بطحا کی

خدا نے نور قندیل ازل میں آپ کا رکھا

بنی جب ذات مقصود نبوت شاہ بطحا کی

نظر نے آپ کو میثاق میں سرکار دیکھا تھا

تصور میں ابھی تک ہے شباہت شاہ بطحا کی

خدائے لم یزل کو روح بھرنی تھی نبوت میں

ہوئی ہے آخرت میں یہ جو بعثت شاہ بطحا کی

یہی وہ اسم اعظم ہے فرشتے جس کو پڑھتے ہیں

رہے تسبیح ہونٹوں پر بہ کثرت شاہ بطحا کی

مرے آقا نہ آئیں گے تو محشر بھی نہ اٹھے گا

ازل سے ہے قیامت کو ضرورت شاہ بطحا کی

چراغ زیر دامان کرم کو کون پھونکے گا

ہے میرے ساغرؔ دل میں حرارت شاہ بطحا کی