زائروں کی بھیڑ ہو روضہ تیرا ہو، میں نہ ہوں

زائروں کی بھیڑ ہو روضہ تیرا ہو، میں نہ ہوں

وائے ناکامی کہ اک خلق خدا ہو، میں نہ ہوں

دل کی دل ہی میں مری جاتی ہیں گھٹ کر حسرتیں

قافلہ ملک عرب کو جا رہا ہو، میں نہ ہوں

صدقہ اس روضہ کے دل سے جسم سے اور جان سے

اک جہاں اک خلق اک عالم فدا ہو، میں نہ ہوں

میں وہ رد خلق ٹھہرا ہوں کہ بزم شاہ میں

انس ہو جن ہوں فرشتہ ہوں ہوا ہو، میں نہ ہوں

کس طرح روضہ پہ جا کر یا خدا ہوں باریاب

جب مری تقدیر میں یہ ہی لکھا ہو، میں نہ ہوں

دفتر ذکر نبی حافظؔ ہے تیری یادگار

تا قیامت خلق میں شہرہ مرا ہو میں نہ ہوں