مسلم ہے قرآں شہادت نبی کی

مسلم ہے قرآں شہادت نبی کی

خدا خود بتاتا ہے عظمت نبی کی

رلاتی ہے خوں مجھ کو فرقت نبی کی

الٰہی دکھا جلد صورت نبی کی

یہ ہے اصل سرمایۂ دین و دنیا

الٰہی عطا کر محبت نبی کی

زمانے کا پھر سے تقاضہ یہی ہے

کہ پھر آ پڑی ہے ضرورت نبی کی

خدا جس کو دے پار ہو اس کا بیڑا

ہے اللہ کی ذین الفت نبی کی

مقامات بدر واحد جانتے ہیں

جلالت نبی کی شجاعت نبی کی

مدینے کے دل میں لگن لگ رہی ہے

خدا جانتا ہے حقیقت نبی کی

الٰہی عطا کر یہ جذب محبت

ہر اک درد بن جائے الفت نبی کی

بصد حسن و اخلاق و اخلاص و شفقت

دلوں پر ہے قائم حکومت نبی کی

مدینہ کی جانب چل اے جذبۂ دل

کہ بے چین کرتی ہے فرقت نبی کی

سر حشر آخر کھلے گا یہ حیدرؔ

رسولوں سے افضل ہے امت نبی کی