دکھا دے یا الٰہی روئے پُرانوار صابر کا

دکھا دے یا الٰہی روئے پُرانوار صابر کا

کہ دیدارِ علی ہے اصل میں دیدار صابر کا

جو آیا جولیاں بھر کر گیا نادار صابر کا

عجب دربارِ گوہر بار ہے دربار صابر کا

لگا ہے جس کے اک تیرِ جگر افگار صابر کا

وہی دیں گے تو پائے گا شفا بیمار صابر کا

میں قطب الدین کے میخانے کی تلچھٹ ہی پی لوں گا

فرید الدین کا صدقہ رہوں سرشار صابر کا

ہزاروں جنتیں میں خاکِ کلیر پر فدا کر دوں

کہ راہِ خلد ہے مجھ کو رہِ پر خار صابر کا

وہ جنت کی شرابوں کی طلب رکھتا نہیں ہرگز

جو پی کر ایک جرعہ ہو چکا سرشار صابر کا

معین الدین کا صدقہ مجھے کچھ بھیک مل جائے

کہ میں بھی ایک ہوں ادنیٰ سگِ دربار صابر کا

مجھے دونوں جہاں کی الجھنیں الجھا نہیں سکتیں

میرے دل میں بسا ہے گیسوئے خمدار صابر کا

یہی طوقِ غلامی حشر میں مجھ کو بچالے گا

مجھے کیا ڈر ہے میں ہوں غایشہ بردار صابر کا

اسے تاریکیٔ مرقد کا ڈر اور خوفِ محشر کیا

کہ حیرتؔ ہے ازل سے آئینہ بردار صابر کا