میرے وارث کی صورت کیا بھلی معلوم ہوتی ہے

میرے وارث کی صورت کیا بھلی معلوم ہوتی ہے

مجھے تو ہو بہ ہو شکل علی معلوم ہوتی ہے

نظر آیا ہے جب سے ان کا جلوہ میری آنکھوں کو

شگفتہ مثل گل دل کی کلی معلوم ہوتی ہے

کوئی سمجھے تو کیا سمجھے کوئی جانے تو کیا جانے

کہ تم کو دیکھ کر کیوں بے خودی معلوم ہوتی ہے

تجلی نے تیری خیرہ کیا ہے میری آنکھوں کو

کبھی معدوم ہوتی ہے کبھی معلوم ہوتی ہے

پہنچتے ہی تیرے کوچے میں جامیؔ یہ پکار اٹھا

گلی تیری مدینے کی گلی معلوم ہوتی ہے