تاج شاہی بھی ٹھوکر میں اپنی رہا جب کہ دل سے غلام نبی ہوگئے

تاج شاہی بھی ٹھوکر میں اپنی رہا جب کہ دل سے غلام نبی ہوگئے

ان کے در کی فقیری جو ہم کو ملی دونوں عالم سے ہم بھی غنی ہوگئے

جن کے معبود تھے پتھروں کے صنم بت کدہ بن گیا تھا خدا کا حرم

بھیس میں آدمی کے جب آپ آگئے جتنے تھے آدمی آدمی ہوگئے

صدقِ صدیق بھی عدل فاروق بھی سب انہی کے ہے فیض کرم کا اثر

یہ غلامی میں آئے غنی ہوگئے وہ فدائی بنے تو علی ہوگئے

عرش پر گھومتی فرش پر گونجتی اہل دل کی تھی دھڑکن بلالی اذاں

جب سیہ فام حبشی نے تھامے قدم لطف سرکار سے سیدی ہوگئے

کون تھا جانتا کون تھا مانتا ہم تو گمنامیوں کے اندھیرے میں تھے

ان کے ذکر مبارک کی برکت ہے یہ ہم بھی عاقلؔ جواب عالمی ہوگئے