ہو مہر و کرم کی مجھ پہ نظر میرے شہباز غریب نواز

ہو مہر و کرم کی مجھ پہ نظر میرے شہباز غریب نواز

ہے دھیان تمہارا آٹھ پہر میرے شہباز غریب نواز

وہ بندۂ خاص خدا ہو تم کہ گدا کو امیر بنا دو تم

ہے کس کی نظر میں ایسا اثر میرے شہباز غریب نواز

دنیا سے نہ مجھ کو شوق رہے عقبیٰ ہی کا مجھ کو ذوق رہے

ہو جائے عنایت مجھ پہ اگر میرے شہباز غریب نواز

یہ داغ غمِ دل دھو جائے ہر مشکل آساں ہو جائے

امید ہو جو کچھ پوری کر میرے شہباز غریب نواز

ہیں آپ خدا کے خاص ولی فرزند نبی اولاد علی

اللہ کا گھر ہے آپ کا گھر میرے شہباز غریب نواز

ہو مجھ پہ نگاہِ لطف و کرم میں جھیلوں کب تک صدمہ و غم

صد پارہ ہوئے ہیں قلب و جگر میرے شہباز غریب نواز

ہوتا بہ فلک عزت اس کی جاگے سوئی قسمت اس کی

تم دیکھ لو جس کو اٹھا کے نظر میرے شہباز غریب نواز

ہے آپ سا کون شفیق مرا محسن غم خوار رفیق مرا

کیا چھوڑ کے جاؤں آپ کا در میرے شہباز غریب نواز

ہاں دیکھیں اٹھا کر ایک نظر اب سوئے حامدؔ خستہ جگر

جز آپ کے لے گا کون خبر میرے شہباز غریب نواز