اے حب وطن ساتھ نہ یوں سوئے نجف جا

اے حب وطن ساتھ نہ یوں سوئے نجف جا

ہم اور طرف جاتے ہیں تو اور طرف جا

چل ہند سے چل ہند سے چل ہند سے غافل

اٹھ سوئے نجف سوئے نجف سوئے نجف جا

پھنستا ہے وبالوں میں عبث اختر طالع

سرکار سے پائے گا شرف بہر شرف جا

اے کلفت غم بندہ مولیٰ سے نہ رکھ کام

بےفائدہ ہوتی ہے تری عمر تلف جا

اے طلعت شہ آ تجھے مولیٰ کی قسم آ

اے ظلمت دل جا تجھے اس رخ کا حلف جا

کیوں غرق الم ہے دُرِ مقصود سے منہ بھر

نیسان کرم کی طرف اے تشنہ صدف جا

جیلاں کے شرف حضرت مولیٰ کے خلف ہیں

اے نا خلف اٹھ جانب تعظیم خلف جا

تفضیل کا جو یانہ ہومولیٰ کے ولا میں

یوں چھوڑ کے گوہر کو نہ تو بہر خذف جا

کہہ دے کوئی گھیرا ہے بلاؤں نے حسنؔ کو

اے شیر خدا بہر مدد تیغ بکف جا