سر کٹا ڈالا نام_خدا پر مرحبا شان_آل_پیمبر

سر کٹا ڈالا نام خدا پر مرحبا شان آل پیمبر

سر ہی کیا دے دیا اپنا گھر بھر مرحبا شان آل پیمبر

یہ کلیجہ تھا آل نبی کا یہ جگر تھا تو ابن علی کا

ہے نہ ہوگا کوئی ایسا رہبر مرحبا شان آل پیمبر

دودھ کا فاطمہ کے اثر تھا ابن حیدرؑ جو سینہ سپر تھا

تھا جلال خدا ان کا تیور مرحبا شان آل پیمبر

تین دن کے وہ بھوکے پیاسے کہہ رہے تھے صف اشقیا سے

مرد مومن کو کیا موت کا ڈر مرحبا شان آل پیمبر

دست شبیر پر ننھے اصغر تیر کھا کے ہوئے خون میں تر

استقامت یہ اللہ اکبر مرحبا شان آل پیمبر

شان عباس علمدار دیکھو کیا نبی کا گھرانا ہے سمجھو

ہے کہاں کوئی ایسا برادر مرحبا شان آل پیمبر

زخم ہے ان کے تن پہ بہتر پھر بھی سجدے میں ہیں ابن حیدرؑ

عصر کا وقت اور تیغ سر پر مرحبا شان آل پیمبر

دین و دنیا میں جو کچھ ضیاؔ ہے صدقۂ خانۂ مصطفیٰ ہے

سب کے مولیٰ ہیں شبیر و شبر مرحبا شان آل پیمبر