نہ یافت وہم و خرد پایۂ کمال علی

وہم و خرد حضرت علی کے مرتبہ کمال کو نہیں پہنچا آپ کی توصیف کا بیان ناممکن ہے، آپ کے حال کو ٹھیک ٹھیک بیان کرنا ممکن نہیں۔

یہ بات یقینی ہے کہ ظہورِ ارواح کے وقت حضرت علی کی روح کا اتصال، روح پاک حضرت محمد کے ساتھ تھا۔

نہال علی ابتدا ہی سے باغ جنت سے اگا ہے اور آب علم سے شاداب ہوا ہے۔

جب عالمِ غیب سے آفتاب رسالت طلوع ہوا تو اوج افق پر ہلال علی بھی جلوہ گر ہوا۔

ایمان کا پہلا قرعہ آپ ہی کے نام سے نکلا کہ خیر و سعادت علی کی فال کا نشان تھا۔

جس طرح اسلام کے پیام اور خطبے نے وحی الٰہی سے زیب و زینت پائی، اسی طرح غزوات اسلام کی رونق آپ کی دلیرانہ جنگ سے ہوئی۔

آپ نے تمام دنیا کے سوالات کے جوابات دیے لیکن آپ کے ایک سوال کا بھی کوئی جواب نہ دے سکا۔

احادیثِ رایت وطیر و غدیر اور ’’عقد اخا‘‘ آپ کی سیرت مبارک کی تصدیق کی نشانیاں ہیں۔

’’مستغفرین بالاسحار‘‘ کی آیت کا نزول حضرت علی کی مناجات اور آپ کے ترکِ لذات نفس کی دلیل ہے۔

تو ’’انفسنا‘‘ اور ’’ولیکم‘‘ کا راز معلوم کر تاکہ تجھ پر حضرت علی کی عزت و جلالت کا انکشاف ہو سکے۔

آپ نے تمام عمر ایک پلک جھپکنے کے وقفہ کے برابر بھی گناہ نہیں کیا کیوں کہ آپ کے سارے لمحات زندگی طاعت حق میں صرف ہوتے رہے۔

جو شخص شراب ناب علی نوش کرے گا وہ خدا کی رحمت کے جام سے تا ابد سیراب رہے گا۔

جس دل کو حضرت علی کے جمال سے نور یقین حاصل ہوا وہ کفر کے اندھیروں سے نجات پا کر ایمان کی روشنی تک پہنچا۔

میں نے جب سے خواب میں جمالِ علی کو دیکھا ہے میرا ایک سانس بھی خیالِ علی سے خالی نہیں رہا۔

اے خدا! تو گواہ رہنا کہ تیرا بندہ جنیدؔ ہمیشہ علی و اولادِ علی کا دوست رہا ہے۔