سائے میں تمہارے دامن کے جس دن سے گزارا کرتے ہیں

سائے میں تمہارے دامن کے جس دن سے گزارا کرتے ہیں

سب اپنے عمل پر نازاں ہیں ہم زعم تمہارا کرتے ہیں

ہے اپنا وظیفہ صبح و مسا ہر حال میں یا غوث الاعظم

جو ناز ہمارے سہتا ہے ہم اس کو پکارا کرتے ہیں

اک حسن مکمل ہوتا ہے اور چشم عقیدت ہوتی ہے

ہم آپ کے روئے انور کا جس وقت نظارا کرتے ہیں

آنکھوں میں ہمارے ساقی کی رہتے ہیں چھلکتے پیمانے

مے خوار ان آنکھوں کا صدقہ آنکھوں سے اتارا کرتے ہیں

یہ اہل نظر یہ دل والے بنتے ہیں نشانہ سب ان کا

ہر تیر ٹھکانے لگتا ہے وہ تاک کے مارا کرتے ہیں

اس بندہ نوازی کے قرباں ہم ان کی نظر کے صدقے میں

اک پردہ نشیں کا گھر بیٹھے بے پردہ نظارا کرتے ہیں

کچھ ربط محبت کے غرے کچھ پشت پناہی کے بھرے

جب کوئی نہیں بھرتا حامی ان کو پکارا کرتے ہیں

فرقت میں کسی کی بے چینی ہم سے تو نہیں دیکھی جاتی

کیا اپنے کسی بندے کی تڑپ سرکار گوارا کرتے ہیں

دنیا کے حسینوں کو کاملؔ محبوب خدا سے کیا نسبت

وہ خود کو سنوارے رہتے ہیں یہ سب کو سنوارا کرتے ہیں