ایک نعرہ سا نکل جاتا ہے اکثر یا حسین

ایک نعرہ سا نکل جاتا ہے اکثر یا حسین

جب سے کندہ ہو گیا ہے لوح دل پر یا حسین

میرا دعوی ہے کہ دنیا پھر نہ پیدا کر سکی

شیر میدان وفا تیرے برابر یا حسین

ابتدا ہر سال کی ہے آپ ہی کی یاد سے

آپ ہی کا تذکرہ سب کی زباں پر یا حسین

اہل عرفاں آپ ہی سے پا رہے ہیں روشنی

نور چشم مرتضیٰ سبط پیمبر یا حسین

ہم بھی ہیں وابستگان حیدر کرار سے

کچھ ادھر بھی صدقۂ دربار حیدر یا حسین

آپ کی چشم عنایت کا کھلا اعجاز تھا

ورنہ حر کا کیا بدل سکتا مقدر یا حسین

تم سے بڑھ کر کس کو حاصل ورطۂ غم پر عبور

درس لیتا ہے تمہیں سے ہر شناور یا حسین

تفرقہ ایمان کا ہے جز و کل میں تفرقہ

جس زباں پر یا محمدؐ اس زباں پر یا حسین

نسبت کاملؔ ہماری رنگ لائے گی ضرور

ہو اگر تیری نگاہ بندہ پرور یا حسین