کملی والے نگہ_کرم ہو اگر نا دوا چاہیے نا شفا چاہیے

کملی والے نگہ کرم ہو اگر نا دوا چاہیے نا شفا چاہیے

میں مریض محبت ہوں مجھ کو تو بس اک نظر یا حبیب خدا چاہیے

اب تو ہو نظر رحمت مرے مصطفیٰؐ آخری وقت ہے تیرے بیمار کا

کچھ بھی اس کے سوا میں نہیں مانگتا تیرے دامن کی ٹھنڈی ہوا چاہیے

تلخئ حشر کیا ہم کو تڑپائے گی خود ہی قدموں میں جنت چلی آئے گی

بات بگڑی ہوئی سب کی بن جائے گی بس ترے نام کا آسرا چاہیے

تاجدار دو عالم حبیب خدا کون جانے کہ کتنا ہے رتبہ ترا

چاہتے ہیں دو عالم خدا کی رضا رب عالم کو تیری رضا چاہیے

تو ہی ایمان سے ہم کو واعظ بتا کس سے مانگیں بھلا مصطفیٰ کے سوا

انبیا بھی پکاریں گے محشر کے دن مصطفیٰؐ چاہیے مصطفیٰؐ چاہیے

نیکیاں کرنے والے ہیں یہ سوچتے خالی صائمؔ کا دامن ہے اعمال سے

پنجتن کی غلامی ملی ہے مجھے مغفرت کے لیے اور کیا چاہیے