ہر سمت ضیا ان کی ہر جا یہی چرچا ہے

ہر سمت ضیا ان کی ہر جا یہی چرچا ہے

حضرت کا رخِ اقدس اک نور کا دریا ہے

خوں خواروں کو بھی جس نے غم خوار بنایا ہے

وہ رحمتِ عالم ہے دنیا کا مسیحا ہے

عاجز ہیں فرشتے بھی توصیفِ محمد میں

اربابِ بصیرت کو کس بات کا دعویٰ ہے

لاثانی ہے جو دی ہے تعلیم محمد نے

دیوانہ ہوں میں اس کا تو اس میں عجب کیا ہے

بے وجہ نہیں ہر گز طیبہ کی لگن دل میں

محسوس یہ ہوتا ہے رحمت نے پکارا ہے

طیبہ کی تمنا ہے مدت سے کنولؔ تجھ کو

انجام خدا جانے آغاز تو اچھا ہے