جادو نہ چلا مجھ پہ جو دنیا طلبی کا

جادو نہ چلا مجھ پہ جو دنیا طلبی کا

سب لطف و کرم ہے شہ مکی مدنی کا

جنت کا تصور بھی اگر ذہن میں آیا

نقشہ نظر آیا ہے مجھے ان کی گلی کا

دنیا اسے انسان کہے میں نہ کہوں گا

احسان بھلا دے جو رسول عربی کا

لے سانس بھی آہستہ کہ دربار نبی ہے

خطرہ ہے بہت سخت یہاں بے ادبی کا

ان کا رخ پر نور رہا ان کی نظر میں

کیا طابع بیدار ہے اصحاب نبی کا

فاروق یہ کہتے ہیں وہ آقا ہیں ہمارے

دیکھے تو کوئی اوج بلال حبشی کا

کوثرؔ مجھے اس جرم سے انکار نہیں ہے

شیدا ہوں دل و جاں سے میں اولاد علی کا