محبوب_دو_عالم فخر_جہاں حضرت_سلطان نظام_الدین

محبوب دو عالم فخر جہاں حضرت سلطان نظام الدین

ہادی و رہبر کون و مکاں حضرت سلطان نظام الدین

مشتاق زیارت ہوں از بس اس روضۂ انور کا ہر دم

جلدی سے بلا لو اپنے یہاں حضرت سلطان نظام الدین

جو کچھ کہ گزرتا ہے ہم پر فرقت میں تمہاری سر تا سر

کس منہ سے کروں میں اس کو بیاں حضرت سلطان نظام الدین

کس منہ سے کروں میں عرض میاں جو جو کہ تمنا ہیں دل میں

حقا کہ نہیں ہے تم پہ نہاں حضرت سلطان نظام الدین

دیکھو تو خلیلؔ بہ چشم یقیں صورت شہ خادم کی بے شک

اس شکل میں ہیں خود جلوہ کناں حضرت سلطان نظام الدین