خراماں ہو اے گلعذار_مدینہ

خراماں ہو اے گلعذار مدینہ

کہ دنیا میں پھیلے بہار مدینہ

مجھے غم نہیں لاکھ منزل کٹھن ہو

کہ ہیں پیش رو شہسوار مدینہ

معطر کیے دیتی ہے جان و دل کو

ہوائے خوش مشک بار مدینہ

برستے ہیں دن رات انوار دل پر

عجب ہے عجب جلوہ زار مدینہ

دل و جاں زر و مال و خویش و اقارب

فدائے مدینہ نثار مدینہ

ابھی رہنے دو محو نظارہ مجھ کو

میں دل میں بسا لوں بہار مدینہ

جو تھا گرد کعبہ کی مستی میں رقصاں

وہ مجذوبؔ ہے ہوشیار مدینہ