قبلہ و کعبۂ صاحب نظر اں فخرالدین

قبلہ و کعبۂ صاحب نظر اں فخرالدین

فخرِ دیں فخرِ زمیں فخرِ زماں فخرالدین

خضر صحرائے بقا، والیِ اقلیم صفا

ہادیِ خلقِ شہِ فیض رساں فخرالدین

پایۂ منزلت وقدر کو تیرے پایا

بر تر از حوصلۂ وہم گماں فخرالدین

محو ہے رنگِ ظہور آپ کا نیرنگی میں

کس سے ہوں آپ کے اوصاف بیاں فخرالدین

وہ جو ہے گلشن سرسبز حقیقت اس میں

قد موزوں ہے تیرا سروِ رواں فخرالدین

نظرِ تیز تری دیتی ہے جو برق جلا

خرمنِ وہم خیالات و گماں فخرالدین

روز وشب یاد تری شغل دل و جاں ہے مجھے

ذکر تیرا ہے سدا دردِ زباں فخرالدین

زیست سے اپنی خفا ہے خفقاں کے باعث

جلد کر اس کا علاجِ خفقاں فخرالدین

عرض حال دلِ معروفؔ کی حاجت کیا ہے

تجھ پہ ظاہر ہیں سب اسرارِ نہاں فخرالدین