جہاں میں فیض ہے اکثر علاؤالدین صابر سے

جہاں میں فیض ہے اکثر علاؤالدین صابر سے

ہوا پرنور ہے کلیر علاؤالدین صابر سے

خبر لینا ذرا جلدی ترا شیدا پریشاں ہے

صبا کہہ دے تو یہ جا کر علاؤالدین صابر سے

صبا میں ہی نہیں طاقت سنائے جو تری حالت

تو کہہ دے خود دلِ مضطر علاؤالدین صابر سے

خدا ارحم ہو مجھ پر بتا دے یہ کوئی آکر

میں دردِ دل کہوں کیوں کر علاؤالدین صابر سے

مجھے عاشق سمجھ کر تم پلا دو جام وحدت کا

کہوں گا ہوش میں آکر علاؤ الدین صابر سے

نہ کیوں خوش ہوں کہ پائی ہے غلامی کی سند میں نے

حبیبِ حضرتِ داور علاؤالدین صابر سے

ترا مفتوںؔ پریشاں ہے بہت حالت ہے غیر اس کی

کہے اب یہ کوئی جاکر علاؤالدین صابر سے