مفلس_وقت کو سلطان کئے بیٹھے ہیں

مفلس وقت کو سلطان کئے بیٹھے ہیں

سارے عالم پہ وہ احسان کئے بیٹھے ہیں

قابل فخر ہے اصحاب پیمبر کا عمل

ان پہ قربان دل و جان کئے بیٹھے ہیں

نام لیتے ہیں فرشتے بھی ادب سے ان کا

کام وہ حضرت حسان کئے بیٹھے ہیں

معجزہ دیکھ کے بوجہل یہ کہتا نکلا

یہ تو کنکر کو مسلمان کئے بیٹھے ہیں

رب کے محبوب کی عظمت جنہیں تسلیم نہیں

کیا خبر کتنا وہ نقصان کئے بیٹھے ہیں

ان کے مضمون کا ہر لفظ انوکھا ہوگا

عشق احمد کو جو عنوان کئے بیٹھے ہیں

کیا حسیں قول ہے معراج ہے مومن کی نماز

یاد یہ آپ کا فرمان کئے بیٹھے ہیں

کر کے توصیف و ثنائے شہ بطحا ہم لوگ

راستہ خلد کا آسان کئے بیٹھے ہیں

قبر کی مٹی انہیں کھا نہیں سکتی گوہرؔ

دل میں محفوظ جو قرآن کئے بیٹھے ہیں