محمد مصطفیٰ آئینہ انوارِ یزدانی

محمد مصطفیٰ آئینہ انوارِ یزدانی

محمد مصطفیٰ دیباچۂ آیات قرآنی

محمد مصطفیٰ سر تا بہ پا اوصافِ صمدانی

محمد مصطفیٰ تطہیرِ کل تقدیس سبحانی

وقارِ انبیا، فخرِ رسولاں، نازشِ آدم

محمد مصطفیٰ مخلوق میں جس کا نہیں ثانی

وہ فاتح جس کی سطوت کی دلوں پر حکمرانی ہے

وہ ہادی جس کی ہر ہر بات معیارِ خدا دانی

وہ اجمل، دھوم ہے جس کے جمالِ کیف ساماں کی

تجمل، جس سے ہے کونین کا طغرائے پیشانی

وہ احسن، حسن جس کا قاسمِ حسنِ دو عالم ہے

وہ جس کے حسن کا اک ریزہ چیں ہے ماہِ کنعانی

وہ مولیٰ جو غلاموں کو عطا کرتا ہے مولائی

وہ آقا جس کے قبضے میں ہے ہر اک کنزِ پنہانی

وہ امی، جو علیمِ علمِ کل ٹھہرا دوعالم میں

وہ جس کے سامنے ذہنِ رسا ہے، طفلِ دبستانی

وہ عظمت ہے، وہ وسعت ہے، محامد میں، محاسن میں

احاطہ جس کا کر سکتا نہیں ادراکِ انسانی

شہِ کونین بستر بوریا اور پیٹ پر پتھر

یہ اندازِ جہانگیری یہ اندازِ جہاں بانی

سرِ محشر، ذرا محشر پہ بھی اے شافعِ محشر!

کریمانہ توجہ، التفاتِ عفو سامانی