میں معتقد ہوں عشق_خوش_عندلیب کا

میں معتقد ہوں عشق خوش عندلیب کا

کہتے ہیں گل عرق ہے خدا کے حبیب کا

کب سنبل بہشت معطر کرے دماغ

گر پہنچے نفع اس کے نہ گیسو کی طیب کا

دے عقل کل کو طفل‌ دبستاں جہاں سبق

اس مدرسہ میں تجھ کو لقب ہے ادیب کا

گردوں پہ عشرت شب معراج کا نشاں

اب تک حنا میں ہاتھ ہے کف الخضیب کا

آواز مانجھتے رہے داؤد عمر بھر

اس آرزو میں کام لے اس سے نقیب کا

فرخندہ بخت ہے وہ جو امت میں ہے تری

ارماں پیمبروں کو رہا اس نصیب کا

کہیے ہدایت اس کو خدا سے ملا دیا

رستہ دکھا دیا ہمیں ایسا قریب کا

دنیا میں نام کو نہ رہا کفر کا مرض

دھو دھو کے پاؤں پیجیے ایسے طبیب کا

صدقہ حسن حسین کا اس وقت یا رسول

ہونا شفیع اپنے شہیدیؔ غریب کا