دختر_اسلام پاکیزہ نسب زینب میں ہے

دختر اسلام پاکیزہ نسب زینب میں ہے

اس لیے لمحات غم میں بھی طرب زینب میں ہے

پشت پر سجاد کو لانے کی ہمت ہاں فقط

حفظ نسل ابن حیدر کے سبب زینب میں ہے

کربلا تا شام کچھ شکوہ نہ ہے خواہش کوئی

جیسے دل بن کر فقط مرضیٔ رب زینب میں ہے

جرأت و ہمت وفا ایثار اور شرم و حیا

ہے جو زہرہ و علی کا سب کا سب زینب میں ہے

گھر کے لٹ جانے کا کچھ شکوہ نہ ہے آہ و فغاں

اک دعائے صبر ہے جو زیب لب زینب میں ہے

بات یہ جذبے کی ہے جذبات کی ہرگز نہیں

جذبۂ ایثار و قربانی عجب زینب میں ہے

بھائی کے بیٹے پہ قرباں اپنے بچوں کو کیا

اے فریدیؔ فردیت یہ بھی غضب زینب میں ہے