مستوں کا آپ کے ہے عجیب مطمح_نظر

مستوں کا آپؐ کے ہے عجیب مطمح نظر

کرتے ہیں سجدہ آپ کی چوکھٹ کو چوم کر

یہ بارگاہ حسن عدیم المثال ہے

روح الامیں جھکاتے ہیں اس آستاں پہ سر

عاشق خدا ہے خود بھی تمہارے جمال پر

ثانی نہیں تمہارا کوئی شاہ بحر و بر

دیکھو جسے ہے طالب دیدار آپؐ کا

لاکھوں سلام آپؐ پہ یا سید البشر

نبیوں کے پیشوا ہو خدا کے حبیب ہو

تم سا ہوا نہ ہوگا کہیں کوئی خوب تر

تم رونق ازل ہو تمہیں حسن کائنات

تم سے ہے فیضیاب ہر آئینۂ نظر

ستارؔ وارثی ہے یہی میری بندگی

نعت رسول پاک ہے میری زبان پر