محمدؐ پر یہ دل اپنا فدا ہے

محمدؐ پر یہ دل اپنا فدا ہے

مجھے عشق محمد مصطفیٰ ہے

ہوا ہوں جب سے میں عاشق نبی پر

زباں پر یا محمدؐ کی صدا ہے

دل دیوانہ کیا دل اک جہاں کا

کمند زلف احمد میں پھنسا ہے

طبیبو چھوڑ دو میری دوا تم

مرض کیسا یہ عشق مصطفیٰؐ ہے

نہیں ممکن نبی کا وصف ہم سے

صفت جب ان کی خود کرتا خدا ہے

نہیں کچھ فرق احمد اور احد میں

فقط اک میم کا پردا پڑا ہے

محمدؐ ہے نہیں اللہ لیکن

خدا سے وہ نہیں ہرگز جدا ہے

مدینہ میں مجھے پہنچا دے یارب

یہی دن رات میری التجا ہے

مظاہرؔ کو بلا لو اپنے در پر

تمہارے غم میں سرگرم بکا ہے