یا علی یا علی کہا کر تو

عقل ہے تو مرا کہا کر تو

محوِ یاد علی رہا کر تو

اک طرح یہ بھی ہے رہا کر تو

اشک رخسار پر بہا کر تو

یا علی یا علی کہا کر تو

متفق اس پہ ہیں خواص و عوام

کر دِلا اس کی معرفت ہے تمام

ہو نماز سحر کہ طاعتِ شام

سرفرو کر پس از درود و سلام

یا علی یا علی کہا کر تو

لحظہ لحظہ جدا ہے اس کی شان

اس کی عادت مروت و احسان

دوستی اس کی عین ہے ایمان

چلے جب تک زباں غنیمت جان

یا علی یا علی کہا کر تو

رہ ولائے علی کا خواہش مند

ہے یہ شیوہ خدائے رسول پسند

دب کے ہرگز نہ رکھ زبان کو بند

پست کرنے کو مدعی کے بلند

یا علی یا علی کہا کر تو

شوق تیرے تئیں نہیں ہے ہنوز

ورنہ سینہ رہا کرے پُر سوز

اس طرح جیسے طفل نو آموز

سیکھے جو صرف وہ کہے شب و روز

یا علی یا علی کہا کر تو

خوف محشر نے میر حال ہے کیا

یہ حواسوں کا اختلال ہے کیا

اس سے محشور رہ ملال ہے کیا

یہ علی تو پھر خیال ہے کیا

یا علی یا علی کہا کر تو