اے پیارے خدا وصف ادا ہو نہیں سکتا، عثمان غنی کا

اے پیارے خدا وصف ادا ہو نہیں سکتا، عثمان غنی کا

اس واسطے کہتا ہوں بنا دے مجھے شیدا، عثمان غنی کا

ہے یاد مجھے بیعتِ رضواں کا وہ قصہ، کیا خوب بیاں تھا

جس وقت بنا ہاتھ مرے پیارے نبی کا، عثمان غنی کا

ہے تیسرا گل باغِ خلافت کا شگفتہ، کیا نور ہے آہا

تازہ ہے جو گلزار جہاں فیض ہے کس کا، عثمان غنی کا

ہیں نور خدا صل علیٰ جب مرے احمد، یہ نور محمد

دیکھے مری آنکھوں سے ذرا کوئی تماشا، عثمان غنی کا

کامل تھے ہر ایک بات میں کیا آپ کا کہنا، اللہ رے رتبہ

پوری تھی حیا اور بہت علم تھا اعلیٰ، عثمان غنی کا

جو ظلم کے در پے تھے سمجھ ان کی تھی الٹی، اللہ کی مرضی

کیا رتبہ تھا افسوس کسی نے نہیں سمجھا، عثمان غنی کا

بندہ ہے ترا گو کہ برا ہے کہ بھلا ہے، لیکن یہ دعا ہے

ہو عشق الٰہی دل شایق میں بھی پیدا، عثمان غنی کا