اب رقم کرتا ہوں نعت_مصطفیٰ

اب رقم کرتا ہوں نعت مصطفیٰ

جس سے عالم کو ہوئی حاصل صفا

سید کونین ختم المرسلین

دور آخر میں ہے فخر الاولین

طے جو کی معراج میں راہ سما

کیوں نہ ہوں محتاج اس کے انبیا

ہے وہ بے شک رحمۃ للعالمین

اس کی مسجد ہے یہ سب روئے زمیں

رحمت خلاق خورشید و قمر

ہووے نازل اس کی آل پاک پر

جس کی انگلی سے ہوا شق القمر

یار تھے اس کے ابو بکر و عمر

ایک تو اس کا رفیق غار تھا

دوسرا لشکر کش ابرار تھا

تھے مصاحب اس کے عثمان و علی

جو کہ ہیں مشہور عالم میں ولی

ایک جو کان حیا و حلم تھا

دوسرا تو باب شہر علم تھا

وہ رسول حق کہ خیر الناس تھا

حمزہ و عباس تھے اس کے چچا

بھیجتا ہوں سو درود و سو سلام

آل و اصحاب نبی پر صبح و شام