خدا رکھے_گا ہمیشہ یہ آشیانہ بخیر

خدا رکھے گا ہمیشہ یہ آشیانہ بخیر

ہمارے قبلۂ عالم کا آستانہ بخیر

خدا کرے کہ دلوں کو یہ چوگ ملتی رہے

رہے یہ مہر و محبت کا آب و دانہ بخیر

مہار پاک میں جاری سماع و رقص رہے

سرود و کیف کا وجد آفریں ترانہ بخیر

مہ و ستارہ وہاں سر جھکا کے کہتے ہیں

تری زمین سلامت ترا زمانہ بخیر

میں اس برس بھی اسیر غم زمانہ رہا

قبول عذر کی امید ہے بہانہ بخیر

اگرچہ ذوق حضوری نصیب ہو نہ سکا

خدا کا شکر کہ ہے شوق غائبانہ بخیر

کسی نے مجھ کو دلاسے میں یہ بشارت دی

پسند آ گئی مدح قلندرانہ بخیر