تری کیا مدح ہو مجھ سے ادا اے احمد مرسل

تری کیا مدح ہو مجھ سے ادا اے احمد مرسل

ترے بندے ہیں سارے اتقیا اے احمد مرسل

کتابوں آسمانی میں خبر دی حق تعالیٰ نے

نہیں تم سا جہاں میں دوسرا اے احمدِ مرسل

عدوے جاں مرا شیطاں ہے تم ہو خضر راہ احمد

خدا کے قرب کا رستہ دکھا اے احمد مرسل

بھروسا ہے قیامت میں خدا بخشےگا ہم کو بھی

نہ ہوگی رد کبھی ہر گز دعا اے احمد مرسل

ترے خاک درِ روضہ مرے اس درد دل کی بس

بنی ہے فیض سے تیرے دوا اے احمد مرسل

ہزاروں دید سے تیرے ہو ے فخر ولی ہر دم

ادھر بھی اک نظر ہو جا ذرا اے احمد مرسل

یقیں ہے روز محشر میں تمہاری ہی شفاعت ہے

ہماری محو ہوں گی سب خطا اے احمد مرسل

امام انبیا تم ہو جہاں کے پیشوا تم ہو

ملایک کے تمہیں ہو مقتدا اے احمد مرسل

بہت کی فکر مدحت میں اڑایا مرغ عقل اپنا

نہ پایا بام رفعت کا پتہ اے احمد مرسل

پھروں کب تک میں آوارہ رہوں کب تک میں ناکارہ

مجھے راہ حقیقت اب بتا اے احمد مرسل

کہاں تک طایر فکر رسا کو ہو مرے پرواز

شکستہ پر ہوا اور وہ تھکا اے احمد مرسل

کرو اب حکم یثرب کا بلا لیجے مجھے واللہ

بھلا کب تک رہوں تم سے جدا اے احمد مرسل

قیامت تک نہ ہوگا وہ کبھی تشنہ دہن ہرگز

کہ جس نے جام الفت کا پیا اے احمد مرسل

ترے ادنیٰ سے چاکر ہیں گروہ جن و انساں سب

مطیع حکم ہے جس نے سنا اے احمد مرسل

خلیل اس نام احمد پر پڑھو لا کھوں درود دیں تم

جہاں پر ہے تری ہر دم عطا اے احمد مرسل