زمزم مئے تسنیم ہے پیمانہ نیا ہے

زمزم مئے تسنیم ہے پیمانہ نیا ہے

ساقی مدنی چاند ہے میخانہ نیا ہے

اتری ہے شراب عرش سے میخانہ نیا ہے

ساقی ہے نیا شیشہ و پیمانہ نیا ہے

فرمانے لگے دیکھ کے عشاق کا مجمع

اس بھیڑ میں شاید کوئی مستانہ نیا ہے

قربان ہوا جاتا ہے ہر ناز و ادا پر

انداز وفائے دلِ دیوانہ نیا ہے

ہے میکدہ عشق کا دنیا سے نیا رنگ

میکش نئے بادہ نیا پیمانہ نیا ہے

واعظ خرد دہر کے افسانے عبث ہیں

ہم کو نہ یہ کعبہ نہ یہ بت خانہ نیا ہے

بیٹھا ہے ترے نام پہ تکیہ کیے مولیٰ

بالاؔ کا ترے رنگِ فقیرانہ نیا ہے