جب رخ پہ تمہارے زلفیں ہوں واللیل کا طغریٰ ہو جائے

جب رخ پہ تمہارے زلفیں ہوں واللیل کا طغریٰ ہو جائے

رخسار فروزاں جس دم ہوں تمثیل والضحیٰ ہو جائے

فردوس کی رنگت کچھ بھی نہیں کتنی ہی دلارا ہو جائے

گلزارِ مدینہ کیا کہیے اک خار ہی طوبیٰ ہو جائے

فاراں کی سعادت کیا کہیے جلووں سے مجلی ہو جائے

ہر ذرے کی قسمت کیا کہنا صد طور تجلی ہو جائے

ہر خار حریفِ جنت ہے ذرہ بھی وہاں کا ماویٰ ہے

ہے فیض جمال رنگیں یہ اس شان کا طیبہ ہو جائے

طوفانِ شقاوت اٹھا ہے عصیاں کا تلاطم برپا ہے

ہے دین کی کشتی موجوں میں اب پار یہ بیڑا ہو جائے

بگڑی وہ بنانے آیا ہے اک شوق کی دنیا لایا ہے

ہے دیر سے حاضر روضے پر خوشترؔ کو اشارہ ہو جائے