مدینے اور مکے میں ازل کی تابناکی ہے

مدینے اور مکے میں ازل کی تابناکی ہے

خدائی میں خدا کی بادشاہی مصطفیٰ کی ہے

خدا کے پاس وہ توقیر شاہِ انبیا کی ہے

انہی سے ابتدا کی تھی انہی پر انتہا کی ہے

نمازِ عشق ان کے آستانے پر ادا کی ہے

دلِ بیتاب تو کیا جانے کہ کیا صورت دعا کی ہے

نہ پھیریں گے کبھی وہ ہاتھ خالی ہے یقیں یوں بھی

جو اہلِ جود ہیں عادت انہیں بذل و عطا کی ہے

رموزِ دین و دنیا آپ جانیں یا خدا جانے

نبی کا جو بھی منشا ہے وہی مرضی خدا کی ہے

قبولیت خود آگے بڑھ کے استقبال کو آئی

محمد مصطفیٰ کے نام سے جب بھی دعا کی ہے

رہے محروم رہ جانے سے دربارِ نبی میں ہم

قضا کا کام تھا افسوس اس نے یہ خطا کی ہے

یہ وہ گہوارہ جنبانی ہے جو سونے نہیں دیتی

ہمارے دل کی ہر دھڑکن ترے اندازِ پا کی ہے

مرا دستِ گدائی دین ہے ان کی سخاوت کی

مسلسل التجاؤں میں خوشی حاجت روا کی ہے

سنائی نعت جب میں نے یہ دربار رسالت میں

سرِ عرشِ بریں اک دھوم صاحبؔ مرحبا کی ہے