دل میں بھرا ہوا ہے جوش_ولائے_وارث

دل میں بھرا ہوا ہے جوش ولائے وارث

کوئی مکیں نہیں ہے اس کا سوائے وارث

کیا جانے کیا کہا تھا کیا جانے کیا سنا تھا

کانوں میں آ رہی ہے اب تک صدائے وارث

دیکھوں تو کس کو دیکھوں چاہوں تو کس کو چاہوں

آنکھیں ہیں محو وارث دل مبتلائے وارث

یہ رنگ زندگی کا رکھے خدا ہمیشہ

دل میں ہو درد وارث سر میں ہوائے وارث

میرا نشان مدفن برباد ہو رہا ہے

اس کی بھی کچھ خبر لے اے خاک پائے وارث

مضطرؔ کا یہ تڑپنا بعد فنا تو کم ہو

تربت پہ آ کے جم جا اے نقش پائے وارث